UA 借錢系列4 - Short Put廣汽@$7.75

今個月廣汽試過兩次升穿$10，仲以為有機會一去冇回頭，但今日廣汽收$8.43，跌穿埋我4月的Short Put$8.5，但係對家冇要我接貨，權金袋袋平安，今日仲落左盤繼續做Short Put，但成交唔到，過埋聽日假期再睇吓點搞。

2 May 2019 Short Put廣汽@7.75收權金$0.18。

股號	期權	期權金	買入股數	期權金	盈虧	月份
3988	Short Put 3988@3.5	HK$0.036	10000	HK$360	HK$360	Jan
3988	Short Put 3988@3.5	HK$0.041	10000	HK$410	HK$410	Mar
2238	Short Put 2238@8.5	HK$0.280	4000	HK$1,120	HK$1,120	Apr
2238	Short Put 2238@7.75	HK$0.180	4000	HK$720	HK$720	May

夢 - 廁所門隙

琴日夢見自己喺屋企去廁所，但度門左右兩邊都有條大隙，出面啲人都會睇到入黎...

另一個夢，夢見羊羊叫偉信同我講明天早上八點要去法院，之後我睇睇啲文件，又心諗咁鬼早，都唔想去，睇吓睇吓啲文件又發現份文件裏面有幾個冒簽，之後出門後見到法國人，同佢飲左杯野又講返冒簽件事，之後又同左兩個新同事行Site 睇安全。

夢 - 小B玩花灑

琴日發夢去左一個地放，外面好似係一個海旁定湖咁，有一條好似海濱長廊咁0既極長的蹓冰路，玩玩吓，中途俾幾個好似老師或上司的人問話，問到好似interview 咁，但我又調返轉頭搵位入返佢地，例如話我用左佢地枝火酒小小分量，枝火酒價值$6，佢地就要收返我$6，於是我就質疑佢地，應該按比例付錢。之後我又趕住去另一單Project 開工，覺得佢地好鬼麻煩。

另一個夢係夢見小B用花灑幫我開定水浸襪，之後佢玩到濕晒，於是索性直接幫佢沖埋涼。

書 – 向人生提問的藝術

呢本書全部都係問題，啲問題有啲哲學及意思，會令人深思及反思，但我睇呢本書的時候都冇乜心機睇，所以好快速咁睇完，之後就唔記得……但記得以下兩段。

記得其中一個問題係：若果投資朋友可以像投資股票一樣，你會投資在那一個朋友身上？我想一想後，覺得沒有一個朋友值得我投資，反而想投資於自己身上。

另外，作家卡爾·尤里烏斯·韋伯( Karl Julius Weber )選擇以「躺在此處的是我的遺骸，我曾經希望，躺在此處的是你的遺骸。」作為他的墓誌銘 。

另一方面又覺得有啲問題問得唔太啱，或者唔應該答，唔應該俾一個問題帶住自己黎走。就好似讓天賦自由所講，人地問你智商高唔高，但智商唔係就代表晒你所有能力。

書 - 發現天賦之旅

呢本係一本工具書，裏面有幾個練習協助你嘗試去發掘自己天賦，但由於我太懶，都係冇做到，淨係影低左，唔知之後會唔會做，不過我諗就算我失業時都未必會做，咁樣係咪代表我唔夠想發掘自己天賦呢!咁樣我真係永遠都唔會成功……

夢- 又多又亂

琴日發左個夢好亂好多野但又唔係好記得咁，我同幾個人喺一個室內0既地方，好似係一啲住宅大廈地下的商場裏面，但啲廁所入口就設喺商場外面，之後我出左去外面搵廁所，但又留低左部電話喺嗰度，去搵廁所0既場景係黑夜0既戶外， 之後諗起留低左部電話，於是就諗住返去拎返，但場景喺去左間戲院，而間戲院又好似好大的紅館咁，入去嗰間戲院又需要戲飛，但由於我冇，所以就要偷偷地入去，但入到去又俾一個女職員發現左，佢係咁追住我，我就係咁落樓梯逃離佢，但最後都俾佢追到。情景又去返戶外，見到個男保安職員，同佢講左兩句野，我就走左，行行吓見到France，佢帶住一個好似有癲癇症0既男子，原來係佢個仔，而佢個仔原來又係啱啱嗰個男保安職員，佢係剛剛工作時冇發作，放工後就發作。

小B投資系列 1 - 買入中國銀行

2019年3月8日以每股HKD3.64買入3000股中國銀行(3988.HK)。

UA 借錢系列3 - Short Put廣汽@8.5

股號	期權	期權金	買入股數	期權金	盈虧	月份
3988	Short Put 3988@3.5	HK$0.036	10000	HK$360	HK$360	Jan
3988	Short Put 3988@3.5	HK$0.041	10000	HK$410	HK$410	Mar
2238	Short Put 2238@8.5	HK$0.280	4000	HK$1,120	HK$1,120	Apr

其實之前仲有4000股喺手，三月$9 Short Put 時接0既貨，四月用左黎做Short Covered Call，收$0.27權金，前日股價仲要升到做$10，不過琴日又跌返落$9.5，真係一日未完都唔知結果，不過就咁睇，有小小貨喺手，又Short Put 又Short Call，股價唔上唔落，食晒兩邊權金都幾過癮，但若果跌穿左$8.5，個個月咁玩，越接越多貨就大獲。

VTECH (00303.HK)

由於女兒的關係，接觸多左VTECH啲玩具，即使我冇買VTECH的玩具，但屋企現時已有4個VTECH玩具，一個係朋友送，一個係買尿片送，另外兩個係親人玩完不要的，再望一望VTECH咁多年的業績及派息都很穩定，而且息率有8%，都幾值得買入作收息用途，但作天VTECH發了盈警，股價跌了10%，真的幸好我沒有買到，有再提示自己，都係買指數好。不過其實買指數都要預自己買入後亦有機會大跌，但只要你是長期持有的話，總會有回本的一天，途中還會繼續派息，而且整個指數會破產的機會，絕對比個股破產的機會低。不過VTECH一向穩健，即使發了盈警，其財務狀況仍然穩健，現價HKD72.1，2018/03 每股賬面資產淨值HKD20.2，2018/03每股盈利HKD6.5，周息率8.58%，呢家又或者係入貨良機呢!

夢 - 見母親叫自己

琴日發夢夢見自己返左十幾廿個鐘工，之後自己一個去睇戲，但係老婆打黎問我去左邊時，我就話我仲OT緊，不過睇完戲又要去一個地方參加公司的一個有野食的講座，當我入左閘撘地鐵去0既途中，Aaron打黎問我走未，意思好似係唔駛去個講座，可以直接走，但唔知點解我又喺同入閘同一個站出左閘，於是試吓去客服，話俾佢知我唔小心出左閘，佢就退返錢俾我，但之後我又去左公司嗰個講座，入到去夾左一隻油雞脾同一隻燒雞脾，食左兩口之際，不停聽都母親叫喚"細佬""細佬"咁叫我，我隔左陣先醒悟到係母親叫我，因為佢無理由知道我呢個時間喺呢度，於是我就出去問佢咩野事，佢就好緊張咁話，我阿哥爭財務公司錢，叫我幫吓佢，我問幾錢，佢又好似唔清楚，於是我就直接同佢上財務公司對數，睇左張單，原來只係幾千蚊，之後我仲要好似公司啲QS咁逐個項目減佢錢，到財務公司個經理睇完，好似都接受我減佢錢咁，之後準備同佢入財務公司的一個夾萬庫，佢拎左抽鎖匙出黎準備開門，見住佢插條鎖匙入門孔，另一面又見到閉路電視影住佢，就係咁就醒左或唔記得了。

檢視投資記錄

近日亂按發現渣打可以賣碎股，琴日終於將輝哥火鍋(即前身大慶乳業（1007）)的碎股以市價賣出，扣埋渣打近來提高了的買賣股票手續費，只收回百多元……都好過繼續留喺度，仲有機會要不停俾手續費渣打。

另外，由2017年開始到呢家，整體股票及期權成績可以話係冇輸冇贏得個吉，近來業績期，令我要好好反思一吓，主要輸錢原因係買入一啲高息的非藍籌股，但當買入後反而唔派息或減息；第二個原因係買左小量細價股，幸好都只係抱住學習心態一試，控制了注碼。而最令我賺錢0既就係匯賢，簡單買入收息，每次除淨後，股價都可以好快復原，不過匯賢業績平平無奇，冇乜增長，加上要用人民幣買，我諗我都係唔會再加碼，繼續收息黎去大陸旅行用。第二令我賺錢0既係期權，特別係廣汽，所以會繼續小小小小咁做short put 及short call。

近日亦終於開左個IB戶口諗住用黎買債券，但係睇左一排，睇黎睇去都好似冇乜邊隻啱買咁，6%息以上的公司債券好似又唔太穩陣咁，3%左右的話又覺得直接買美國國庫債好過，呢種買唔落手0既感覺令我一直都冇買到，直至有一日睇Youtube見到有人唔建議買債券，令我更加卻步，但啲資金到底要點處理呢！？

再睇左幾日Blog，都係還原基本步，直接買盈富基金、S&P 500 ETF 及Bond ETF再做好資產配置最好，所以我賣晒手上大部份股票，只餘下匯賢、建行及上個用short put 入左的一手廣汽。

當我IB 原有HKD 100,000.00即USD 12,738.85。打算安照以下分配，逐步買入ETF再每個月進行再分配。

ETF	VOO	VTI	GOF	PML
應佔百份比	25%	25%	25%	25%
可分配額度	USD 3,184.71	USD 3,184.71	USD 3,184.71	USD 3,184.71
每股現價	USD 262.62	USD 146.38	USD 19.69	USD 14.21
可分配單位	12.1266978	21.75647886	161.7426803	224.1177604

但近月港元不斷觸及每美元兌7.85弱方兌換保證價關口，令我一直都未將IB裏的港元轉做美元，而股市又好似不斷向上咁，搞到我都好似一直呆等咁，唯有搵日得閒啲再搞。

返到屋企，見到樂活五線譜，諗諗吓都係唔好係又買唔係又買，睇睇樂活五線譜先買。