彩星集團業績

其實當初買入彩星純為學習性質，因此當時於$1.15只買了4000股，以現價$1.07計都只係蝕$320，最新出份現績都麻麻，但派息3仙都算中規中矩，另外，當時買入佢係因為見到佢當時每股資產淨值係$25，但彩星喺2017/03/29 將1股拆10股，而我係喺當時直接睇芋網上顯示的每股資產淨值，但呢家諗返，無論喺股息或每股資產淨值，都有需要睇年報再自己計先會好啲同準確啲，因為根本唔知啲網顯示0既數係拆左股前的後得出黎，以我呢家睇最新年報顯示最新資產淨值為6,632,389,000，期內已發行普通股之加權平均數2,118,704,000股，即每股資產淨值係$3.13，以現價$1.07計，P/B為0.34，與雪球現顯示的0.36差不多。呢隻股票又令我上左一課，暫時會繼續持有。

雖然未到年結，但所有公司都出晒業績，簡得總結一下以作記錄(不包括任何手續費):

股號	買入價	現價	買入股數	買入總價	現值	總股息	盈虧	盈虧%
410	4.2	4.45	3000	12600	13350	2352	3102	24.62%
635	1.15	1.07	4000	4600	4280	120	-200	-4.35%
778	9.72	9.13	1000	9720	9130	255.3	-334.7	-3.44%
1285	2.3	1.85	10000	23000	18500	1470	-3030	-13.17%
1426	3.2	3.3	8000	25600	26400	760	1560	6.09%
87001	3.09	3.09	7000	21630	21630	963.9	963.9	4.46%
			Total	97150	93290	5921.2	2061.2	2.12%

整體黎講只有2.12%升幅，連通脹都唔知追唔追到，離我本來目標每年10%甚至係差好遠，表面睇，最大原因緊係嘉士利股價0既跌幅啦，唯有期望過嘉士利明年業績變好啦，但有某仔師兄講過期望某公司明年業績變好係投機而唔係投資，不過嘉士利就算明年業績持平，其實依然係一間有盈利0既公司，如果佢每年派息不變，15年已經足以另我回本，而且就算係幾好幾大0既公司都有盈利倒退或蝕錢0既時候，以嘉士利2017年半年度年報來說，暫未睇到佢會出現盈利倒退或蝕錢0既情況，所以所有股票都會繼續持有，等睇下年業績，另外，諗深一層，有幾隻股票我係後半年先買入，收小左半份股息。

總之今年目標係要確保2018年前有30萬現金作投資，喺我呢家0既狀況，只要唔好俾人炒，應該都可以做得到。

------------------------------------------------------------------------------------------------

今日發現計多左410的股息，實在冇時間改返，都係留待年結再review。

嘉士利及SOHO中國業績

嘉士利業績令人有點失望，幸好公司尚有錢賺，以我買入價$2.3計算，每股盈利有10.14分都算免強可以接受，以上半年報表來講，好難預測後半年盈利，可以說好壞參半，所以決定再睇多半年先再決定，若果下半年盈利有返增長，派息不變的話，將會繼續持有。

而SOHO中國業績則另人刮目相看，潘石屹真係一個敢作敢為、前瞻又創新0既人，SOHO 3Q即係共享辦公空間呢個理念已經唔係第一次聽，喺我搵工期間，已經有過一間類似0既公司叫我去面試，我已經對呢間公司有啲興趣，但其實又有啲覺得享辦公空間呢樣野都幾難個，細心啲睇年報，會發現賺錢純粹因為投資物業的評估增值由2016年0既11億升到2017年0既61億，呢啲水份完全只係帳面賺，而唔係生意盈利能力，暫時黎講，繼續持有，睇佢會唔會繼續大派息(今期將會派發每股人民幣0.346元的特別股息)，同埋租務方面會唔會真係賺到錢。

有啲想增持SOHO中國，但考慮現時買入任何股票0既風險都好大，所以都係要繼續忍手，不排除出糧後及除淨前會忍唔住入多小小。

無論如何，呢兩隻股票都另我學習到好多野，無論賺定蝕都係值得。若果嘉士利將來業績繼續變差，會另我更加小心，只買入一啲藍籌股及較大型0既公司，但其實嘉士利已經算係中國餅乾界龍頭，唯有拭目以待啦，而SOHO中國教識我管理層經營理念真係好重要，世界不斷轉變，如果公司唔作出轉變，幾大0既公司都有機會被淘汰。

嘉士利集團

除淨前買入以$2.3買入了1萬股，今個年度派了$0.15，買入原因係因為某Blogger有入，每年盈利上升，息率吸引，當時並建議了老婆購入了5千股一同收息，派息後股價平穩，但直至今日已跌至$1.9，只計算股價，跌幅已達17%，直得記錄及檢討。

首先，小弟承認買入時資料搜集準備不足，見某Blogger有入，自己就入，今次股價跌幅咁大，可以作為小弟再一次踏入股市的好考驗。直至現時亦沒有任何新聞報告嘉士利有任何問題，若股息不變的話，收多一兩次息可回本，但損失了機會成本，以現時市況來說，不會進行溝淡，亦不會再買入，有待業績公布再作決定，如業績正常的話，會繼續持有，這就是價值投資，公司業務狀況，盈利及派息沒有太大問題的話就值得繼續持有，短期的股價升跌是不用理會的。

幸好我老婆不會留意股價，否則會為我帶來壓力，買股票真係最忌同人講，身邊0既人見你買0既股票股價大跌就會好多說話，影響投資者判斷及操作，所以買完股票之後，都係唔好同人講，十年後就知結果。

恒生指數跌穿27000

因於北韓及中印問題，恒生指數跌穿27000，但其實股票價格依然偏貴，按照小弟本來預測，仍會有一段水位升，本來諗住0係呢段時間按制買入3000股朗廷收息，但考慮到若有任何戰爭問題，必令股價大跌，所以都係決定繼續儲備現金等待適當機會才大手買入。

自從返左新工後，就沒有時間上網，公司啲人都成日OT，搞到我都唔好意思準時走，呢啲公司情況真係好麻煩，真係唔明白佢地諗乜，如果真係因為有需要而OT，我覺得為左搞好件事，都尚可接受，但若非必要而特登咁做的話，真係頂爛事。無論如何，今次呢個Project 實在有趣，我都好想盡我能力去完成佢，希望唔會未過試用期就俾人炒左啦。

老朋友聚舊

昨夜與久違了兩年左右的老朋友聚舊，跟他們說起有關財務自由0既野，他們都抱著質疑0既態度，始終我尚未成功，甚至連起步都未算係，而且我都只係紙上談兵，亦都冇任何數據支持，難怪佢地會有點抱著取笑我的態度，結果真係代表一切。其實自己未成功都唔太想提出呢樣野，但係一想到要成功最小要花十年時間左右，現在不跟他們說的話，他們又會浪費左啲時間值，說了就當重了朋友的責任，其他就等十年後0既結果啦，希望自己起碼經歷最小一次0既熊市，咁先可以代表我唔係靠運氣，而係真係理解到投資0既真諦，所以最後先會成功。亦都希望我身邊0既朋友都可以早日達到財務自由，真真正正咁享受佢地0既人生，唔駛再為三餐而苦惱。

轉工

做左新工幾日，唔係遊車河就係遊船河，冇乜做過啲咩野，其實做左幾日就覺得呢份工唔係咁好，但呢幾日依然抱住感恩及知足0既心去返工，始終比起好多人，我已經算好好及幸運，但喺今日收到兩個更加好0既新offer，最後決定即日辭職唔做，已免令現在間公司因為我而蝕得仲多，星期一開始返新工，希望係好同可以做得長啦。

由於返工關係，股票都冇乜睇，暫時應該都係抱住守望態度，升太多的話會開始減持，否則就會保持不變，繼續收息。儲多啲彈藥，等跌市時一炮過。

匯賢及置富中期業績持平，匯賢將會派息人民幣0.1377，比上年同期派息人民幣 0.1439小了一點，但息率依然算高，而置富則會派息港元0.2553，比上年同期派息港元 0.2478多了一點。