夢 - 家人。喪屍

前日夢見離異了的父母在柴灣的家，又夢見阿哥。

琴日發夢見到自己做左警察，遇到喪屍。

啲夢其實應該唔算短，但唔知係我記憶問題定係表達問題，只能很簡短寫兩句。

Design Thinking 01 玩轉創業

十幾年前已經成日想創業，因為覺得打工真係好悶，搵啲錢又小，由有想創業嘅思想直到現在，都仲係想創業，試過擺跳蚤市場賣首飾、做年宵攤位、去泰國旅行認識當地人及購入她的貨品，在香港賣，但通通都沒有成功，直到呢家，覺得自己根本唔夠料去應付自己嘅工作，仲講咩野創業丫，但Steve Jobs 話過，無論如何都要不停尋找自己嘅夢想，直到搵到。另外加上中年危機，只靠打工，日日望公司唔好炒自己都唔係辦法，遲早玩完，所以我都keep 住睇一啲有關創業嘅書，今次呢本Design Thinking 01 玩轉創業教你一步步行的六步心法，由基本認識、親身觀察、觀點陳述、原型制作、測試反饋去創業，每一步都用PUSH，Principle, usage, suggestion, homework黎運作。其實成日讀死書嘅我，要做到學以致用真係唔容易，但係都要不停閱讀、學習、嘗試，直到成功。

夢 - 女兒

由於女兒大汗，直到前日訓覺都仲開緊冷氣，琴晚真係覺得開始凍，所以就試吓唔開冷氣，唔知係咪因為咁，搞到我個女頸背成日出汗同埋醒左好多次，每次醒又要抱佢同我地一齊訓，等佢熟睡啲又搬返佢去BB床，之後就不停輪迴咁，冇覺好訓，又搞到我都唔知佢到底係同緊我地訓定係喺BB床訓緊，訓訓吓發左個幾恐佈嘅夢。

場境係喺我以前柴灣住嗰間屋，夢裏面見到我老婆帶左啲朋友黎玩，我就自己湊住個女，發覺個女塊面皮膚有啲問題，於是就帶佢去睇醫生，醫生話我個女中左病毒，俾左啲藥膏佢搽，醫生話搽完都唔好就冇得夠，同埋啲病毒只要面貼面就會傳染。
返到屋企幫個女搽完，好似都好唔返，之後佢就發晒癲咁要同我面貼面，將病毒傳染俾我，我好驚咁推開佢，但又唔可以整傷佢，我見到佢好似就快會死，但又越黎越癲，而我老婆仍然喺屋裏面另一間房玩緊，之後我想搵野綁住我個女，但係一個人搞勁都搞唔掂，最後佢就香左，我將佢條屍放左喺大門口附近，但由於大門半掩，有鄰居見到有條BB屍，好似想去報警，我老婆同個朋友終於出返廳，見到之後，我就講返成件事俾佢知，點知佢竟然毫不在意，仲話隨便掉左條屍佢，但眼眶流住眼淚話非法處理屍體係犯法，不如報警，之後就醒左。
唔知係熱得滯定係驚得滯，我件衫胸口都濕晒。

另外發左個夢係我揸住電單車準備去球場同舊同學踢波，去到個球場變左車房，於是我就走喇。

恒生指數跌3.54%

琴晚發夢夢見自己對Jordan 4 其中一隻鞋頭好似鴨嘴咁開左口。真係唔知我嘅潛意識搞緊咩！

琴晚道指大跌3.15%即540點，而今日恒指就跌左3.54%即927點，一隻股票平時上落3、4%絕對係等閒事，但指數黎講就算多喇，唔通真係好似其他人所講，熊市已經來臨？我真係唔知道，唯有貫徹之前方案，跌市唔會再入，繼續儲蓄，但亦都唔會止蝕手上股票，除非短期內比我買入價升多5%或以上才會逐步減持。

總係覺得呢家仲未係股災嘅時候，因為上帝要你滅亡，必先拎你瘋狂先，但我唔覺得年頭大升市就係瘋狂過。

夢 - 小B長大

小B大個得好快，去到十五歲，同我老婆企埋一齊，差唔多高，喺樓下家利成門口傾偈。

真係唔知潛意識想透過呢個夢話俾我知啲乜！係提示我珍惜光陰、與家人相處時間？抑或係我十五年後都係冇本事搬離呢家住嗰度？

坐言起行

$4.07買入春泉，支持要約。

呢家大部份都話進入熊市，一向買咩都輸0既我，梗係繼續輸啦，到底係熊定牛，我真係唔識分，只係睇市盈率同週息率，恒指需然未去到吸引0既地步，但買入一點點都尚可接受，我當然唔敢同大市對抗啦，今個月入左啲貨，之後都唔會夠膽入，當係一個benchmark咁，儲彈藥等到市盈率跌到落8倍左右，週息率升到6%左右先入貨。現時週息率4%，但由於美國加息，十年美國政府債券孳息率已經有3.2%，咁仲有乜需要冒風險買股票賺嗰4%回報。

印傭返國

由我個女一出世，湊我個女湊到呢家，大約湊左有九個月嘅印傭Tini唔再續約，要返印尼結婚生仔喇，其實對佢黎講到係一件好事黎嘅，唔通成世人都冇人湊仔做家務，冇晒自己嘅人生咩！？我覺得啲印、菲傭可以黎香港做幾年野，體驗吓，又可以一次過賺多啲錢，好似working holiday 咁，其實都唔錯，但原來有好多印傭都會喺印尼生完仔後，又過返黎香港做野，一諗起佢地啲仔女得幾歲，但為左搵錢就焗住同仔女分離，其實都幾慘。

暫時未見到個女因為佢嘅離開而唔開心，但唔知過多幾日，佢會唔會發現呢！？

唔知Tini 生完仔後，又會唔會再去其他個家做家傭呢！？希望佢唔會咁慘啦，其實我地都只係想簡簡單單同屋企人一齊食飯過活啫，點解好似都咁難咁嘅。

買入2800等收息

$27.45買入2800，之後想即刻做short cover call，但由於跌市，唔啱價，冇肉食所以做唔到。另外十月份short put 939@6.5收0.116期權金及short put 2388@8收0.4期權金，一short put就路穿晒，唔通又要接貨?

春泉產業信託 01426.HK

之前買過，本來諗住長線投資，但發現佢派息越黎越低，所以就賣了，賺了15%，之後股價由我買出價$3.5一直跌到落$2.99，本來一直都冇再留意佢，但前幾日無端端睇到佢爆升到$4.1，查一查發現係因為某大股東太盟投資集團提出全購要約，每基金單位作價$4.85，距離現價仲有18%，市場沒有直接將股價拉升到$4.85左右，當然係因為驚最後收購唔成啦，有機會買兩手學習吓。

夢 - 足球、金田一、打拳

無端端參加左隊足球隊訓練，中間發生左金田一殺事件，練習時見到有個好弱嘅人好努力咁練拳，佢見到我地後，有啲尷尬，我我勉勵佢，佢每練嘅每一拳都一定會有一點點進步，不會白費。