創業之二

差不多見左十個人，加晒入Group 再開埋會，最後全部都散晒，得返一個阿C繼續留喺度做野，間公司真係全部靠佢撑起。成日都會想放棄，最後都係靠住不停搵D打針先至可以繼續落去，再不停搵人見人，不知不覺又有七八個人做野，唔知啲人幾時會走，唯有不停輪迴，總之最重要係不停做啲野出黎再放出市場試反應。

期權金頂支出 - 2

美股納指實在升得好快，好多人YTD已經過100%，但我仲係負緊，所有人都講緊要買TESLA咁0既破壞性創新股，搞到我想做Short Put 都好難搵野做，好多要ATM先做到4%，但唔做就只有等，等又唔係辦法，唯有焗做。

一個月袋USD1700期權金，不過唔知最後駛唔駛接貨。

7 Aug 2020：

FSLY 之前short Put @$60，今晚到期，應該都袋硬，但前日見佢急跌十幾%，於是再做一星期Short Put @$90，點知琴晚又跌近20%，跌穿左$90，令我好猶豫搬唔搬倉好，最後都冇做到，另外做左DDOG Short Put @$80，點知呢隻一晚又跌10%，好彩仲未跌穿，我到底知唔知自己買緊咩同做緊咩?

最新期權表更新如下：

困局

呢家中午做外賣，踩盡都係兩個鐘$180，好彩有單做三個鐘就$270，其實每小時$90已經算係唔錯0既收入，但係過左午飯時段已經冇乜單，日日曬到嘔，出汗出到成件衫濕到透晒，加上肺炎要帶口罩，琴日送外賣去其中一棟大廈，管理員檢查體溫，37.6度唔俾人，之後打俾客又冇聽電話，餐廳叫我等體溫下降，大熱天時點降溫，咪玩啦，索性拎袋外賣返屋企食左佢。

創業方面繼續做緊，但係好似一直都唔順，最大問題都係在於自己唔夠料，越黎越覺得呢個世界日日都充斥住機會，問題係你有冇能力去把握，而我就係冇能力嗰個。經常都想放棄......

呢家外賣又搵唔到錢，又曬又辛苦到都開始唔想做，好想個天落多啲雨......創業方面相信有排都唔會有咩進展，再係咁入不敷出落去，真係入左一個困局......

期權金頂支出 - 1

六月不停做外賣真係做到好累，雖然我已經係hea 做同埋都只係開左22工，每日開工唔夠6個鐘，但係實在係日曬雨淋，加上每單0既錢得返$30咁小，最後只賺到$6091.64，六月家庭開支包括供樓費水電煤等就要$7,370.00，另外飲食開支等碎數就要$4,861.40，總支出就已經$12,231.40，未計我老婆每月都要俾供樓同工人錢$5,000.00，撇除個女讀書每月$5,000.00同埋保險每年6千，即係只計自己就每要拎萬三左右，計埋老婆嗰五千，就要萬八，計埋老婆洗費加女兒讀書保險就要三萬左右，真係好難搞。現在首要目標係要收入大過支出，即係要每月有萬三現金流入，再進一步目標就係要扣除支出儲到錢，再遠目標就係每月現金流入三萬。

整體黎講，工人錢同埋女兒學費都係可減的，但係未去到需要咁做0既地步。

經過今次先令我開始反思以前我阿媽一個月先搵得一萬幾千仲要養大兩個仔，仲要我就業後經常辭職唔做，帶埋女友食屋企住屋企，我阿媽開支係幾難頂。

不過都係嗰句，塞翁失馬焉知非福，冇今次失業，我就未必會反思呢啲野，唔會知道ARKK同Cathie Wood，唔會同"D"一齊玩創業，唔會做之後0既野，亦唔會變成之後0既我。

為左要頂到每月支出，做左上面呢堆期權，到底我會輸到仆街，連好辛苦儲落0既錢都輸埋，定係會幸運地俾我咁樣達到財自，行出一條我一直想行0既路，只有時間可以見證。

由我喺2020年7月3日Short Put ARKK，當時股價$72，2020年7月8日已經升到$80，幾日就升11%，即刻cap低樂活五線譜做記錄：