女兒十個月大就病到要留院

星期二返工，老婆就通知我，個女發燒，去樓下診所睇完，食左退燒藥，到零晨12:30am再測佢體溫，升到40.9度，於是就帶佢去荃灣仁濟醫院睇急症，當時大約1am 左右，去到醫院度體溫大約39度左右，醫生話要送個女去瑪嘉烈留院，可安排救護車送我地全家去，於是我就諗，咁不如去私家醫院，反正有保險，於是我地拎左仁濟封referral letter 直接撘的士去荃灣港安醫院，點知去到，醫院話冇床位，最後又自己撘的士去瑪嘉烈，去到瑪嘉烈，由登記、等、探熱、等、塞pet pet 退燒藥、等、X光照肺、等、安排住院、等，搞到大約5:30am 先上到病房安頓，之後啲護士要帶小B入房抽鼻口液化驗，我同老婆都不可陪同，喺房外面聽到佢不停喊，到佢抽完，我老婆即刻抱返小B，小B好嬲咁喊左我一野，眼神完全表露出佢好嬲我地掉低佢，嗰吓感覺真係幾抽心，之後老婆留喺醫院，我即刻返屋企執野再返醫院，匆匆食個早餐，就叫老婆返去訓先，10am左右再測體溫，燒退到落37.5，本來仲滿心期望黃昏可以「回家渡假」，直到1pm 左右老婆阿媽黎頂我，我就即刻買飯返屋企同老婆食完即刻沖涼訓覺，訓落床已經3pm，由我前一日7am起身返工，到第二日3pm先訓，總共32小時冇訓過，上床前老婆媽通報小B又燒返上39度，好大機會唔可以回家渡假，一上床就訓著，訓到7pm左右又要起身返醫院頂我老婆，中途保險經紀打俾我，話幫我問問左私家醫院，近我屋企嘅都要輪候床位，都唔知買份保險黎仲乜，保險呢樣野容後再檢討，同老婆匆匆食個飯盒，差不多10pm就叫我老婆返去訓先。11:30pm 餵退消藥，餵完之後，護士話隔5分鐘先餵奶，以免佢嘔返晒出黎又唔可以再食，點知我等左5分鐘，一餵水，佢就嘔，又錯過左一次食退消藥嘅退燒機會...
火
4am 再食一次藥，終於冇嘔，小B呢晚都算訓得多，7am左右起身飲奶都飲170ml，之後俾啲甜奶麥佢食，佢又肯食，但測體溫都係有38-39度，我食埋佢食淨嗰啲當早餐，10am 左右老婆黎頂我，我就返屋企訓覺，3:30pm左右醒左，見到老婆短訊話有機會「回家渡假」，希望今次係真嫁啦。

當人唔病時，就唔會每日感恩身體健康時嘅幸福，到病左嘅時候先至覺得只要身體健康，其他野都唔重要，到好返嘅時候，又再受到常生活嘅洗禮，又再唔識感恩，不停咁輪迴。

夢 - 釣魚

琴日發夢去左釣魚，用左條平時食用咁大嘅倉魚做餌，之後引左條日本鯉魚𣄃咁大咁長嘅魚上黎，但其實條魚又唔係咬緊我嘅餌，隔黎個大叔見我唔知點搞，於是佢就放左舊大肉丸咁大嘅丸落條魚個口，以為條魚食完會訓著，點知條魚就咁走左。之後又釣到另一條大魚，今次條魚真係俾我個鈎鈎上黎，釣到上黎放喺地下，好大條又好色彩斑斕咁，我問個大叔食唔食得，佢話得，又話可以拎去賣，我話我冇野裝，想俾埋佢，佢話釣到零晨時份，會有人黎收呢啲魚，於是我等到啲人黎收，又跟左啲人去佢地間舖頭，之後就唔記得Lo...

書 - 女力！微型創業必修心法－－投入小資本，創造屬於自己的事業版圖

呢本書都一本建議小B大過要睇嘅書，內容應該都唔會過時，大致上係講現在好多人都唔知自己真正想做乜，就不停隨波逐流，讀大學等，但其實我地應該一早就培養獨立思考能力，向自己內心搵出自己真正想做嘅野，再努力磨練有關技術。

對客、做事或創意設計都要有同理心，企喺人地角度諗，將人地嘅事放喺自己身上去處理。

書 - 成功率90％！上班族微型創業聖經：早晚30分鐘，穩穩賺進人生幾桶金

估唔到呢本書都好似「遇見未知的自己」咁，叫讀者向自己內心尋找，由興趣出發去創業，如果唔知自己興趣，就向童年回憶，成功或被贊許嘅事尋找，或者由弱點轉化為強項（例如由不懂英文到學好英文的過程）。當搵到自己嘅興趣後，最小要睇六十本有關嘅書及到訪100家相關的店，令到自己成為專業，另外，要成為第一，但不需要全世界第一，例如自己市區裏面的第一，第一多客、第一快、第一好質素等等，其中一樣第一就可以了。

呢本書值得收藏再睇。

上兩星期左右個女半夜發燒，帶左佢去睇急症，之後斷斷續續又帶左佢去睇醫生，中途我又病左，再加個女唔係太接受呢家個新工人咁，每次得返個新工人睇住佢，佢都喊到拆天咁，每當呢個時候都會諗，只怪自己未做到敗務自由，否則就可以自己湊返個女，唔駛拎到個女病之餘仲要成日喊，好彩近排佢算好返好多，亦都好彩我呢家份工都算自由又舒服。不過成日都仲要擔心俾人炒都真係唔係辦法。

講黎講去，都係要向內心尋找真我，活出真我又可以搵到小小錢，達到最基本嘅財務自由真係好重要。就算活左咁多年，諗左咁多年都仲未做到，但都係唔可以停止，要不停繼續思考及嘗試。不過見住身邊嘅人不停咁為專業考試而努力，而自己就唔知係咪懶惰而搵藉口，覺得人始終都唔應該太隨波逐流，而係要向住自己嘅內心、自興趣去行，但係冥想（或者係我以為自己係㝠想緊，但其實經常都只係發呆或訓覺）左咁耐，都係冇前進過，會唔會係錯呢。係呢啲時候，結果就代表一切，但要到我死前才會知道結果。

夢 - 打飛機

前日夢見有個擬似皇后嘅人要我喺一個小時內打十架飛機，咁先可以夠醒昏迷左嘅擬似皇帝，當我收到呢個消息時，時間已經過左二十分鐘，即係只餘下四十分鐘，我覺得好難做到，場景一轉，去左食雞度，我殺左好多敵人，最後剩餘幾個敵人，我沒有殺到，反而同佢地成為隊友，我話俾佢地聽拯救皇帝事件，之後一齊諗方法想達成目標，我不停好似星矢咁跑樓梯，之後就醒左。

撘車打呢篇文途中，想生產一個課程，教導小了友理財。