終於搵到新工

呢兩日數到三個offer，三個offer人工都同以前份工一樣，比較過後，揀左一份覺得較有機會發展自己事業0既一份黎做，但係將會由以前的銀行假變做勞工假，年假由原來的16日跌到落7日，以及將會由原來的五日工轉做五日半。以2018年度計算的話，即係總共小左38日(9日年假+5日銀行假+24日(五日半的半日))，若果花紅達到1.5份糧的話，這份工作才化算，當然亦要視乎呢份工作會唔會帶俾我其他額外利益。

早前叫我轉去佢公司做嗰位人兄終於打返俾我，但因為某些原因，大家都決定唔合作住，等過一段時間再決定。但因為今次呢件事，另我對呢位人兄0既信任度大大減低。

由7月4日last day 到8月1日再就職，差不多失業了一個月，浪費了搵多一個月人工的時間，但係令我再一次認識價值投資及財務自由呢樣野，再加上可以迫我離開本來0既comfort zone 去作出改變，都未嘗唔係一件好事，都係嗰句，塞翁失馬，焉知非福，最後都係睇結果。

今次失業除左令我再一次認識價值投資及財務自由呢樣野之外，亦都令我對工作0既態度有所改變，以前成日覺得份工唔夠好，又唔係自己想做0既野，成日都唔知足，但係經過今次失業時期，開始覺得感恩有工作做，同埋作為員工，應該要站喺老闆0既角度去工作，令自己工作時更加用心學習所有野，抱住自己出去創業都會有料有競爭力0既心去做。

股票方面，作日以1.15買入4000股彩星集團(635)，其每股淨資產值HK$28.5，實在相差好大，但上年度盈利不好，所以小注買入這枝股票觀察。

其實好多Blogger 都唔建議喺呢個時期入市，因為恒指呢段時間都升左好多，就算買入高息股都好大機會賺息蝕價，但係下一個cycle 又唔知幾時到，考慮到大部份公司業績都唔錯，如無大意外，股市應該只會保持住調整及向上，所以我最終都決定小量入市收息，到跌市時再大手入市溝淡，如短期內跌市都唔會賣出手上股票，只會長擺收息，如升市的話就會視乎情況賣出。