期權金頂支出 - 1

六月不停做外賣真係做到好累，雖然我已經係hea 做同埋都只係開左22工，每日開工唔夠6個鐘，但係實在係日曬雨淋，加上每單0既錢得返$30咁小，最後只賺到$6091.64，六月家庭開支包括供樓費水電煤等就要$7,370.00，另外飲食開支等碎數就要$4,861.40，總支出就已經$12,231.40，未計我老婆每月都要俾供樓同工人錢$5,000.00，撇除個女讀書每月$5,000.00同埋保險每年6千，即係只計自己就每要拎萬三左右，計埋老婆嗰五千，就要萬八，計埋老婆洗費加女兒讀書保險就要三萬左右，真係好難搞。現在首要目標係要收入大過支出，即係要每月有萬三現金流入，再進一步目標就係要扣除支出儲到錢，再遠目標就係每月現金流入三萬。

整體黎講，工人錢同埋女兒學費都係可減的，但係未去到需要咁做0既地步。

經過今次先令我開始反思以前我阿媽一個月先搵得一萬幾千仲要養大兩個仔，仲要我就業後經常辭職唔做，帶埋女友食屋企住屋企，我阿媽開支係幾難頂。

不過都係嗰句，塞翁失馬焉知非福，冇今次失業，我就未必會反思呢啲野，唔會知道ARKK同Cathie Wood，唔會同"D"一齊玩創業，唔會做之後0既野，亦唔會變成之後0既我。

為左要頂到每月支出，做左上面呢堆期權，到底我會輸到仆街，連好辛苦儲落0既錢都輸埋，定係會幸運地俾我咁樣達到財自，行出一條我一直想行0既路，只有時間可以見證。

由我喺2020年7月3日Short Put ARKK，當時股價$72，2020年7月8日已經升到$80，幾日就升11%，即刻cap低樂活五線譜做記錄：

2020年6月結

IB 顯示YTD 係-3%左右，日股繼續蝕25%左右，新加坡REIT蝕20%，蝕最多0既美債就係35%，之前諗，呢啲都係賬面蝕，等幾年計埋息就會返返黎，但近來入左啲blogger 的Whatsapp 群組，再睇左好多之前冇接觸過的Blog，見到人地買美股2020年頭半年已經賺緊25%-60%，計一計自己呢家失業，本金又得一百萬唔夠，想做到靠蝕息財自真係唯有靠槓桿，但係冇收入，再加上呢真係好驚跌市時頂唔住，所以都唔敢做咁大，驚有咩事冇錢補倉，年頭蝕左30%左右，最後慢慢靠Short Covered Call 追返，不過都係有運，反思呢本年，我買的日股同新加坡REIT都蝕得幾多，好彩控制注碼，但就浪費左機會成本，都係美股ETF 加期權較適合我。呢家計落，其實我槓桿一倍，每年7%回報就算係可以做到好勉強0既財自，雖然2019年時我算係做到8%回報，但當時未將全部資本投入，冇做槓桿加上算係牛市尾先做到，今年頭半年即刻輸突。展望下半年應該繼續做ETF加期權，再作檢討。

創業之一

唔知呢個系列唔知會唔會寫左一次就唔再，因為創業真係好易令人氣餒，由一開始D教我搵人，到搵到差不多十個，再叫佢地做野，feedback 返黎係令我覺得自己太無料，無辦法叫人做野，更令我覺得自己好無用，對其他野都覺得好無力，有種好唔想再做0既感覺，但如果放棄的話又唔知仲可以做咩，所以都令自己想繼續硬住頭皮去做。

失業接近一個月

失業接近一個月，期間不停做外賣，但由於通常平日只拎到中午間，做三個鐘，好彩的話，每個鐘先搵到$80-$90，一日搵唔夠三百，其實慳啲洗都冇乜問題，其實我都已經好慳，但買一包尿片或一罐奶粉已經差不多等於我一日搵0既錢，加上星期日通常湊女唔開工，加上著拖鞋又腳痛，著鞋又腳痕問題，有時去吓沙灘又冇開工，六月半個月黎講，唔計每月的家庭主要開支的$6,000 (供樓、工人人工、水電煤等)，只計飲食，免強仲有千幾淨，不過就要諗點補返$6,000返黎，但真係搵$6,000都唔容易，其實肯返多啲工，應該都搵到，不過呢個月都係hea 啲先。

股票方面都冇乜變動，但上個月個的Short Covered Call 都升穿左，明天好大機會會俾人接晒啲貨，上半年賺到的期權金算係啱啱好補返$300 Short Put VOO 接到的貨，再$285 Short Covered Call 被接了的貨，變相高買低賣得個吉。

套返啲現金又唔知入唔入返貨好，本來仲諗住賺到期權金再用黎幫補每月開支，但其實真係唔可以咁計...就算俾我好彩每月賺到的錢完全夠補每月開支，但我的資產根本冇增值過，同埋要賺到每月開支真係好難。

之前見返Damon 諗住創業，佢教左我一啲方法，真係幾有趣，但成件事都好似遊戲咁，好唔實在，但呢樣係唯一令我比較有希望0既野，唯有跟佢指示繼續試玩落去。

搵工方面可以話完全冇進展，見個兩份工，頭一份用英文面試左個半鐘，我又好成實咁講話我其實根本唔想做呢行，同面試者講我去過澳洲Working Holiday，佢都覺得好有趣，另外問左我好多技術上0既野，我好多都唔識答，佢最後俾我0既建議係叫我移民，做到的話，我都好想，如果我呢家只係一個人的話，我諗我會做到。

呢次面試令我重新諗我係咪應該考牌，但其實我都唔太想考，逃避同埋懶係主因，但我又唔可以就咁停喺度。