樂活五線譜

今日查吓樂活五線譜，之前VOO升到好高時，查過佢升穿左最高條線，之後真係跌到HiHi，真係好準，呢家喺佢跌穿最低條線0既時候記錄低佢，睇吓佢遲啲係咪升返上去，呢家入市個位係咪就係啱。

2020年美股直擊之四

美股大市都仲係跌左10%，其實話多唔多，不過唔知我份工可以挨到幾耐，持貨能力又係幾耐，暫時計都係冇乜壓力，但必須控制借貸，若三月的short put 接晒貨，我就唔可以再有任何借貸行為。

而Macy 最後20Mar20@$11 Short Put，權金$0.26成交左，但係直到今日亦已跌到US$11.49，距離US$11接貨價又近左一大步，真係步步驚心，估佢唔到，所以真係唔好估市，而要做到升跌都贏或唔會輸到仆街0既portfolio。

2020年日股及美債 - 2

直至今日，美債WPG由買入價計跌左13%，日股方面，Canon 由買入價計跌左11%，而三井住友金融更加跌左18%，真係唔知點追，日股總共借左約HKD50,000的日元買，年息1.5%，即需HKD750一年息，咁就擺佢幾年睇吓啦。
上年買落的新加坡REIT SV3U都由買入價計跌9.5%。
真係全部都衰晒...哈哈，投資呢啲野真係一世，放長雙眼先知輸贏，收住息幾年先講啦。
不過又係機會成本問題喇。

2020年美股直擊之三

正常2月21日食晒上期啲期權金後，個市繼續向上，搞到繼續short put 又唔係，唔做又唔係，進退兩難時，我只做了一手VOO short put @$300 收權金$2.3，第二日見佢繼續升，又做左手後訓覺，點知一訓醒，美股就開始跌，最後做多左一手VOO short put @$300，並由於美股大跌而權金係$6.31，其後幾日美股繼續跌超過10%，上年賺到0既，一舖清袋，投資就係咁樣，呢家就係考驗我到底有冇進步到，真係學識投資0既時候，由於我冇乜槓桿，所以正常應該守到，不過由於武漢肺炎問題，加上蕃薯呢家走左，冇左大樹摭陰，再禍不單行地黎左個麻煩上級，呢家份工都危危乎，但好彩平時加停支出控制得尚算低，一個月萬五應該有找，若再計埋同老婆分一半負擔的話，我只需搵一萬一個月都仲有錢淨，咁樣繼續做吓送外賣都應該頂到，既來之則安之，或者所有黎緊0既變化都係一件好事，咁樣先可以迫自己去改變，因為若外在唔改變的話，我諗我都只會繼續安於現狀。

另外，之前買嗰兩隻日股都跌10%左右了。

再另外，喺太跌市0既時候，美股啲期權金好吸引，Macy現價$13.23，我試做了20Mar20@$11 Short Put，權金$0.25，即係股價要喺20Mar20跌$2.23(即17%)，我先要接貨，否則就袋2.27%期權金。唔知成唔成交到。

2020年日股及美債 - 1

2020年1月30日買落的美債PBI CORP 4.625% Mar15"24   宣布現金收購要約如下：

以我理解應該係比市價$96.25 加多$3  另外再加期間0既想收返，而我本來係以$95.84買入，即係賺3.56%，唔知到底幾時搞掂可以收錢，當三月尾的話，兩個月賺到3.56%對於我黎講已經係一個好唔錯0既回報，所以我會接受要約。由於我買入數量好小，所以其實對成個portfolio影響不大。

另一債券WPG由買入到現在跌左6.13%，都係由於我買入數量好小，所以其實對成個portfolio影響不大，而且買債券0既mind set 係唔應該在乎債價升跌，而係在乎債息，但係另我反思，我到底應唔應該買債券，因為年回報率唔算高，自己又唔熟識間公司，但係間公司就有機會執笠，另到自己total loss。

日股方面，Canon 由買入價跌左7%，真係賺息都蝕價，再深入睇佢報表，淨收入每年都跌

現金流量表就更加令我擔心：

如我冇理解錯，2019年係負一千億日元，資產負債表好似仲訂得住，好彩我買入數量唔多，總價2萬港元左右，仲要係借日元買，年息1.5%，即係每年交3百港元息，擺多幾年睇吓最後結果係點。

而另一隻日股三井住友金融比買入價跌左3%，但財務狀況正常，都係擺多幾年睇吓最後結果。

上年買落的新加坡REIT SV3U，都係浮浮沉沉咁，冇乜改變，都係要擺耐啲睇，但係IB借新加坡元要3%息左右，為左賺息差的話，或者我應該唔好執著借日元買日股，而係應該借日元換新加坡元買新加坡REIT或美股，但係匯價又係另一個考慮因素。

咁多野加埋好似越黎越複雜咁，好似都係直接買VOO好過，VOO同VTI淨係由年頭到呢家已經升左4%，好過我做Short Put。

不過睇返樂活五線譜，美股已經去到頂線，令我進退兩難，直接買入又唔係，做貼價Short Put 又唔係咁，好驚一接貨就跌到仆街。雖然上個月有驚無險地將期權金袋袋平安，但真係唔知幾時會一次個嘔返晒出黎。

呢家只Short了VOO Mar20"20 300 Put $2.3權金，但若我唔做多啲，啲現金冇運作及工作，變相0回報就會拉低成個portfolio 全年總回報，呢樣野做係好麻煩。

賣出GOF 及 PML

其實買呢兩隻野嗰陣都其實唔係好識，只係知道佢地係債券組成的基金，人地買我又買咁，琴日分別以$18.53賣出GOF及$15.45賣出PML，計埋啲息都算賺小小啦，算好彩喇，賣出GOF原因係佢用緊本金派息，而PML 係因為佢減緊息。

2020年日股及美債

由於日元息率低，如下圖：



所以決定學習下借日元買日股，以買狗股方法，只買日經平均指數裏面較高識而自己又比較認識的公司。

公司	目前股價	息率
三井住友金融集團（東證1部：8316）	3885	4.66%
佳能（東證1部：7751）	3029	5.29%
NTT DoCoMo（東證1部：9437）	3102	3.85%

見到原來呢啲公司都有期權又想試吓，不過唔知係冇乜成交定點，IB又冇乜顯示到啲交易，應該都買唔到，多數都只會買小小正股，小試牛刀。

另外，呢兩日買左幾隻美債如下，學習吓。

今日買左日股如下，佳能今日跌左4%，主要原因係業績盈利跌左，唔知股息最後頂唔頂到借貸利息再加跌左0既股價，不過stock for the long run。

公司	買入價	現價
三井住友金融集團（東證1部：8316）	3875	3869
佳能（東證1部：7751）	2983	2917

2020年美股直擊之二

按原力策略做左極貼價期權如下：

直到2020年2月1日，VOO跌到US$295.69，其實跌左3%唔算係啲咩，但我都要反思吓呢個貼價策略係咪做得唔啱。

創業之一

未讀完書已經成日想創業，試過做年宵(只係夾錢同幫小小手)、擺市集小攤檔、網上賣野及正式開過兩間公司，但都係好似冇乜努力過啲乜，所以隔左十幾廿年，最後都係冇成功過，但係心裏面依然想繼續去嘗試，睇完『財務自由速成法』及『90後的半退休生活』後，又再想嘗試創業，除左為左錢之外，創業對我黎講好似先會令我人生完滿同有意義，其實都唔係追求要搵大錢，只要達到同現有人工差不多已經會令我好滿足。

記錄喺度係為左逼自己有啲期限去完成一啲創業的工作，以免自己又唔郁，亦都勉勵自己，就算失敗都要繼續嘗試。

『90後的半退休生活』作者喺最後引用倪匡的一段話：

『地球在這無邊無際宇宙中，渺小得根本不值一提。就如陽光從窗外射到你桌子旁，你看見那一粒上下浮動，小得看不見的塵埃。而身處地球上的你，生命更如一聲嘆息般短暫。』

喺我未見到呢段說話，我已經成日都咁諗，所以一直都接受唔到自己日復日咁返工放工，冇善用生命短暫0既時間去做自己真正想做0既野。

將會做0既所謂創業，其實都冇乜特別idea，自己亦都冇乜市場優勢，所以都令我有啲郤步，但係為左唔好俾藉口自己，都係迫自己行動左先，好似書裏所講，都係要靠自己睇市場反應再作出改動。

2020年美股直擊之一

2020年1月1日到2020年1月17日，VOO同VTI都已經升多過3%，而我喺2019年12月買入的期權亦都喺2020年1月17日到期，全部變晒廢紙，好辛苦先賺到約0.7%的期權金...亦都另我唔知點繼續買期權好，好似上個月咁，唔貼價的話，都賺唔到1%，但若太貼價，又有機會焗住要接貨，話晒美股都不段創新高，都唔知幾時會回吐。

睇返上個月經驗，做左五組 Short OTM Put，變相要留好大舊錢以備接貨，黎緊諗住試吓Short ATM put，減小接貨錢，但取大啲期權金，試吓會唔會變相高位接貨...

書 - 『財務自由速成法』及『90後的半退休生活』

自從政治事件開始，拎我都冇辦法專心睇書，隔左好耐冇睇書，撘車時間都用左黎做文宣，不過近來覺得可以睇返，咁樣都唔知係好事定壞事喇。
上星期同個女去左圖書館，又咁巧合地借到『財務自由速成法』呢本書，終於開始睇，前半部內容都同我一直0既理念好脗合，大致上都係講緊要做生意脫離老鼠圈，後半部開始講點做，但都係講就容易，要做到就好難，就例如若你的工作係銷售員，咁就要做到Top Sale，但一間公司又有幾多個Top Sale丫，正如書裏面成日講80/20法則。

睇到差不多剩返五份一，終於有啲實際Idea，不過都係知易行難，首先係喺三個途徑諗生意，第一個就係喺工作上，留意自己公司、競爭對手、供應商及供應商的競爭對手，第二個就係喺興趣上發展，第三個就係喺自己消費上發展，呢個諗法真係幾有用，

另外就係作者提及，Idea係唔值錢0既，只有實行左，經過市場測試再調教到賺到錢先有用。

之後睇埋『90後的半退休生活』，呢本真係一本好實用0既工具書，但應該要一邊實行，一邊不停睇黎跟住做。

睇完呢兩本書，真係覺得每個人都可以做生意，爭在到底我地有冇真係花個心機、努力同時間去實際行動。

『財務自由速成法』裏面提過，每個人都可以做到，只係爭在你有冇去做，到我差不多死時，或者都只得後悔自己冇做到......