筋膜/鍵炎就診記錄

今年2月頭開始覺得右手中指僵硬痛，無法伸直，諗住擺一排睇吓會唔會自己好，點知都冇好到，亦是趁住有日早放，去左醫療咭包的一間連鎖集團睇普通科醫生，醫生俾左啲消炎止痛藥，並話若果食完藥都唔好就要睇專科打針。食左三日藥都冇好到，於是落返屋企樓下睇返睇開的普通科醫生，佢俾左另一種消炎止痛藥我試，並翻查記錄，發現我於2016年曾經出現過同樣情況，當時我一食完消炎止痛藥就好返晒。之後大半個月其間，不斷睇返樓下的醫生食返同一種消炎止痛藥都係冇乜好到，醫生話唯有『等時間過』，當時都唔係太明佢講乜。夜晚有時痛到有啲辛苦，於是又去左中醫做針灸，之前聽人講針灸係唔痛的，但由於我針0既係手掌骨位，都幾痛吓，痛到本來有多汗症0既我，出汗出到佢張床到顯晒。針灸完第二日，本來腫起的手掌骨位真係消左腫，但中指中節好似反而腫左同埋更加伸唔直。其間繼續睇返樓下的醫生，食左啲疑似勁啲0既消炎止痛藥，但都未好。叫個醫生寫信俾我做物理治療，但佢又唔太肯，於是我自己去睇左朋友介紹的一間物理治療，做完好似好左小小，但第二日又還原返咁，用左$800，仲要由於冇專介信就去睇，claim 唔到錢。

於是又去針灸針埋中指中節位，又痛到張床濕晒。一直以為應該係係因為玩得電話太多而導致的筋膜/鍵炎，但上網查吓有關徵狀，懷疑自己係類風濕性關節炎，呢個病都幾麻煩，於是我又再去睇另一個普通科醫生，詳細講述我呢段時間的醫歷及懷疑自己有機會患左類風濕性關節炎，呢個醫生好似好好咁好詳細講述類風濕性關節炎俾我聽，詳情亦與我在網上看到的料吻合，佢建議專介我去內科，但我都係想試吓佢啲消炎止痛藥，睇吓有冇用先，可惜食完都係冇乜用。於是我為方便，又去返樓下醫生，拎左張醫生紙去睇醫療咭包的一間內科，內科俾左另一隻消炎藥我，並專介我去驗血，我一直以為醫療咭唔會包驗血，所以我去到櫃位時都冇拎醫療咭出黎，個護士話驗血要收二千蚊，我就俾左張信用咭佢簽，簽完後，個護士唔知係咪收到內科的電話，知道我有醫療咭，於是又可以退返錢，用返醫療咭，下次真係乜都要試吓拎張醫療咭出黎先。

食左新新嗰隻消炎藥幾日，好似拎我好返好多，但又好唔晒，隔幾日再去內科，驗血報告顯示我冇事，醫生建議再食多次消炎藥試吓先，唔得的話，唯有專介我去骨科打類固醇針，但醫生話佢自己就唔會打呢啲針喇……

整段醫療其間，我極力減小用電話，其實我本來的電話使用時間每日都不多於3小時，比起好多人應該都唔算多， 自從手指有事後，更加將電話使用時間減至每日不多於2小時，另外亦盡量不再用右手而改用左手，但由於工作關係，都迫住用多左左手用電話。今次再食左內科的消炎藥後，右手好似好返8成，但不幸地左手中指出現左同樣問題，於是唯有再睇內科專介我去骨科，骨科醫生都係話唯有再試食消炎藥及留意吓自己做得多咩野動作才會出現呢個問題，以我所觀察都係因為用手提電話，醫生話再唔得就唯有打類固醇針，但類固醇針有副作用，我話俾佢知我已經食左個多月消炎藥，於是佢就俾左消炎止痛膏我，試左一晚，左手中指就更加僵硬痛及無法伸直，晚上差點連抱起我女兒都做不到，於是第二朝一早就落返樓下睇普通科醫生，諗住拎啲消炎止痛藥頂住先，醫生話唯有做手術，好過打類固醇針，因為打得第一次打類固醇針，你會以為好返晒，又會不停用隻手，過一年左右又會復發，又打第二次類固醇針，不斷循環下，啲筋遲早會斷，另外，我再同佢講呢段其間，我隻右手好似針灸完再食左內科的消炎藥而好返，佢話係因為我冇再點用右手，加上食消炎藥食到咁啱呢段時間好返，應該都唔關針灸事，我心諗呢樣就係佢之前所謂的『等時間過』，如此類推，咁即係我唔好再隻左手，繼續食消炎藥都有機會好返啦，喺呢個時候，由於我唔想打類固醇針，所以我諗住繼續食消炎藥試吓，人類都係傾向相信自己想相信0既野。

唔知係咪因為隔左晚冇食消炎藥，一食消炎藥即刻消腫消痛，好似好返好多咁，Keep住食左消炎藥幾日，今朝就算停左藥，右手都好似好返晒咁，左手就仲有啲事咁，但好似好左9成。

整個醫療過程睇左7個醫生，聽左唔同醫生的意見及自己上網查左好多資料，本來最唔相信樓下個醫生，但最後反而最想相信樓下個醫生。呢件事真係好需要記錄以警愓我日後再遇到類似的問題時，要好似今次咁處理。幸好我冇去到打類固醇針及做手術，應該冇乜需要。